أنا كمبرمج كمبيوتر لما بفتح المصحف واقرأ كلام ربنا … فى آيات فى القران لما بحطها جنب بعض … بعرف ان استحالة ده يكون كلام بشر … وان الوصف ده مايقدرش يوصفه فعلا إلا خالق الكون.
للناس الى بره المجال إحنا عندنا فى البرمجة لما بنعمل Software بيبقى فى عندنا مجموعة من العوامل الى بنهتم بيها وبتدخل ضمن متطلبات المشاريع بتاعتنا والى بيكون فى بينها تعارضات فى كثير من الاحيان صعب توازنها مع بعض إلا اذا كنت محترف … من ضمن العوامل دى حاجة اسمها التجريد او ال Abstraction … وده معناها مستوي التبسيط فى الكود بتاعك (الاوامر الى بتكتبها عشان تتحكم فى الالة وتعمل الى انت عايزه) يكون على مستوي عالى لدرجة انه يبقى قريب من المشكلة الى بتحلها (الوظيفة الى بيقوم بيها البرنامج) … عندنا عامل تانى كمان مهم اسمه الأداء او Performance … وده يتعلق بزمن تنفيذ المهام الى بتقوم بيها البرامج مقارنة بالزمن المتاح او المتوقع او المطلوب … بمعنى اوضح سرعة البرامج … عندنا عامل كمان مهم وهو البيانات Data الى بنتعامل معاها … حجمها قد ايه وطبيعتها عاملة ازاى.
لما افتح المصحف والاقى ربنا سبحانه وتعالى بيقول فى القران الكريم
(إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ)
ده اعلى مستوي من الـ Abstraction ممكن اى مبرمج فى العالم يقدر يتخيله ويستحيل يوصله الا فى حالة خاصة و بطريقة واحدة بس … ان البرنامج يكون معمول اصلا قبل كده … وده يديلك صورة عن قدرة ربنا لما يتكلم عن قدراته بالطريقة دى … لازم يكون فعلا يمتلك كل شىء و يقدر يعمل اى حاجة
(وَلِلَّهِ مُلْكُ السَّمَاوَاتِ وَالْأَرْضِ ۗ وَاللَّهُ عَلَىٰ كُلِّ شَيْءٍ قَدِيرٌ)
احنا كمبرمجين لما بنعلى بمستوي الـ Abstraction فى تصميم البرامج بتاعتنا … بنواجه غالبا مشكلة تتعلق بالاداء Performance كل ما زادت طبقات ال Abstraction وعمليات التواصل بين الطبقات دى ونقل البيانات بينها … كل ما حصل بطء ممكن جدا تلاحظه فى المشاريع الكبيرة والى بتعمل مهام كثير … طيب ربنا سبحانه وتعالى اتكلم ووصف مستوي ال Abstraction بانه اعلى حاجة … طيب قال ايه عن ال Performance
(وَمَا أَمْرُنَا إِلَّا وَاحِدَةٌ كَلَمْحٍ بِالْبَصَرِ)
والاية دى عطف على قول ربنا ( إِنَّا كُلَّ شَيْءٍ خَلَقْنَاهُ بِقَدَرٍ)
يعنى قمة ال Abstraction … قمة ال Performance … قمة العلم.
طيب والبيانات Data اخبارها ايه … ربنا سبحانه وتعالى بيقول
(وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَٰذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا ۚ وَوَجَدُوا مَا عَمِلُوا حَاضِرًا ۗ وَلَا يَظْلِمُ رَبُّكَ أَحَدًا)
يعنى يوم القيامة هتلاقى عملك كله الى انت عملته فى الدنيا متسجل عند ربنا … مش عملك انت لوحدك بس الى متسجل … ده عمل كل البشر على مر الزمن … فى كل يوم فى كل لحظة … مفيش Big Data أكبر من كده ممكن بنى ادم يتصورها … احنا فى عصر بقى عندنا فيه اجهزة ومعدات تقدر تسجل صوت وصورة … وعندك برامج تقدر تدخل عليها معلومات ضخمة جدا … ده مكنش موجود من 1400 سنة … فكرة ان كل شىء فى حياتك يبقى متسجل … فكرة اكبر من اى عقل ما شافش تكنولوجيا … فكرة انك تسجل كل حياة الناس والى بيعملوه على مر الزمن … اكبر من قدرات اى مبرمج عنده كل التقنيات المتاحة فى عصرنا.
لما تفتح كتاب ربنا وتلاقيه بيكلمك عن اهم المعايير الى بيتكلم عنها اكبر المبرمجين فى الابحاث والرسائل العلمية … ويوصفلك قدرات تعجز اى حد بيشتغل فى العلوم دى … ده مش وصف بشري … ده وصف الخالق سبحانه وتعالى.
سبحان الله وبحمده … سبحان الله العظيم
محمد سمير
https://www.facebook.com/mahmoudfayed1986/posts/10156647139205345
