عزمي بشارة بقى راكب ومدلدل على كل حاجة بتعملها أو بتشارك فيها قطر في الجانب الإعلامي، من أول الجزيرة الرئيسية مرورا بالمكتبات ودور النشر والمعارض القطرية ومواقع المقالات والمدونات، وحتى نسخ الجزيرة الليبرالية زي +AJ والتليفزيون العربي بكل العك اللي بيحصل فيهم من وقت للتاني، حاليا ده مبقاش زمن القرضاوي في قطر خلاص، الشيخ القرضاوي بقى عامل دلوقت زي الجد الكبير كده تبوسه وتاخدلك صورة معاه تتبارك بيها وتعلقها عالحيط أو تحطها كوفر للبروفايل، الشغل كله بيمشيه أونكل عزمي بشارة.
من ضمن الناس اللي عزمي بشارة عرف يطوّعهم كويس داخل الثقب الأسود بتاعه ده: مجموعة الشباب الإسلامي اليساري اللي كانوا بتوع شعلبوط معرفي وزنقات ثقافية ومعارض كتاب أيام الثورة زمان .. أغلب الناس دي حاليا بقوا ليهم ارتباط وشغل كتير من قريب أو بعيد مع صاحبنا ده والدنيا اللي بيدورها في قطر، وتمويل مواقعهم الصحفية ولقاءاتهم أو شغلهم البحثي سواء في قطر او تركيا والأردن معتمد على مدى صلتهم بالمؤسسات اللي بيديرها الراجل ده من الدوحة.
المهم، الناس دي تيجي تقرأ كلامها في مدونات الجزيرة أو مواقعها الصحفية القريبة من الدوائر القطرية زي إضاءات مثلا أو حتى منشوراتها عالسوشيال ميديا من وقت للتاني تحس إنهم بيتكلموا زي ما نكون أسقطنا السيسي في مصر وبشار في سوريا وحتى آل سعود بالسعودية وآل زايد بالإمارات وقاعدين محتارين دلوقت في شكل الدولة اللي نعملها تكون إسلامية ولا علمانية … وخد عندك بقى مقالات ومنشورات وحزق نخبوي للصبح عن استحالة تنفيد أي نموذج للدولة الإسلامية، واللي هو لأ يا جماعة لازم تمشوها ديمقراطية بعلمانية كاملة والإسلام يادوب نكون متصالحين مع شعائره الطقوسية بس، وطبعا متنساش النموذج التركي والتونسي النهضوي تصلي لهم ركعتين بكرة وعشيا بحكم إنهم درة التاج الإسلامي في نظم الحكم الحديثة اللي المفروض نقتدي بها، روح شوف مثلا الحزق اللي معتز الخطيب هاري نفسه طول الوقت عشان يقنع الناس بيه وده مثال بسيط للي بنتكلم عنه.
بصرف النظر عن صحة أو خطأ الكلام اللي بيقولوه، أنا عن نفسي الحقيقة عمري ما عرفت إزاي واحد مقتنع بوجوب تحكيم الشريعة الإسلامية (بأي فهم يا سيدي أنا معاك) من غير إقامة دولة تعترف بسيادة هذه الشريعة أساسا، وبالتالي قيام الدولة المسلمة من حيث المبدأ هو أمر بديهي لو فعلا انت بتتكلم عن مسلمين شايفين دينهم ده واجب التصرّف والتطبيق في شئون حياتهم وأمر معاشهم ومش هيترمي في صلاة جوا مسجد والسلام … لكن برضه إيه لازمة الزنّ عالودان حول الموضوع ده بالذات في أكتر وقت الدنيا مطربقة فوق دماغ الكل حاليا؟، واشمعنى من مؤسسات قطر الإعلامية وأرزقجية إسلام اليسار المكتباتي اللي كانوا آخرهم زمان يمشوا في حملة أبوالفتوح والعيال الإكس إخوان؟؟، دولة إسلامية مين يابني اللي بتتناقش في عدم جدواها وانت السيسي وبشار وابن زايد وابن سلمان منيّمينك على بطنك بقالهم ست سنين؟!!، ما تخليك في الخرا اللي انت فيه ده لما تشوف صرفة تخلص منه الأول، عاملين زي الاشتراكيين الثوريين اللي نفضوا للصراع السياسي ونقلوه لصراعات الاحوال الشخصية وخانة الديانة متخصكش والمساواة في الميراث حق مش مزية وكوكتيل اللفت الحمضان بتاعهم ده، الله المستعان!
أحمد محمود
https://www.facebook.com/balama.elbanna/posts/10214448623590833
