ربنا قفل باب المسجد في وشي
فلان مات لكن مش هايتصلى عليه
الكلام ده بقى يتقال كتير ولكنه من وجهة نظري بيعكس جهل وسوء ظن بالله.
يا جماعة ربنا مش مستفيد حاجة من صلاتكم في المسجد. ربنا مش موقف رحمته بالميت على دعائكم وصلاتكم.
احنا بنعمل الحاجات دي عشان دي عبادة وأسباب للرحمة. لكن لو عجزنا عن فعل هذه العبادة لعذر فربك رحيم.
الرسول صلى الله عليه وسلم كان طالع غزوة فقال للصحابة فيه ناس في المدينة ماتمشوش في مكان إلا وشاركوكم الأجر. حبسهم العذر. ما قالش للصحابة (أكيد الناس اللي ماحضرتش الغزوة عملت حاجة غلط عشان كده ربنا حرمهم من الجهاد).
نقولها تاني:
ربك الرحيم. أرحم بالميت وبك من أمكم
ربك الكريم. يديك وانت ماتستحقش
ربك اللطيف
اوعى تسيء الظن بربك.
قال رسول الله صلى الله عليه وسلم إذا مرض العبد أو سافر كتب له مثل ما كان يعمل مقيما صحيحا.
ربنا مابيقفلش بابه في وش حد. ده قال للكفار إن ينتهوا يغفر لهم ما قد سلف. المهم احنا نتوب وننتهي. توبوا وهاتلاقوه غفور رحيم كريم.
حسام عبد العزيز
https://www.facebook.com/hoswriter/posts/2646486062307108