رسالة لكل من تابع المؤتمر العالمي للموهوب ايلون ماسك : استهدوا بالله ومفيش داعي للانبهار الزايد ولا المبالغة في التوقعات ولمزيد من التوضيح نقول ما يلي :
الجهاز اللي اعلن عنه ايلون ماسك عبارة عن دائرة اقطاب كهربية فائقة القدرة ومتناهية الصغر لاسلكية في حجم العملة المعدنية تتزرع تحت الجمجمة او في نسيجها العظمي نفسه. الجهاز ده يعتبر نموذج مطور لأجهزة رسم موجات المخ العادية الموجودة من سنين في مستشفيات العالم كله واللي بترصد العمليات الحيوية والسيال العصبي بين خلايا المخ Neurons وبعضها وكمان اتصالاتها مع باقي اجزاء الجسم من خلال النخاع الشوكي Spinal cord. كمان يعتبر نموذج حديث للتدخل بالأقطاب الكهربية في نسيج محيط المخ.
ايه ده ؟ هو بس كده ؟! امال ايه الهيصة اللي اتعملت دي وانه هيخلي الانسان متصل بالكمبيوتر والعربية ويلعب في الذاكرة براحته ويعالج الشلل والزهايمر وفقدان السمع والبصر والسكتة الدماغية Brain stroke والاكتئاب وطالما هيعالج الاكتئاب يبقي هيقدر يتحكم في مستويات هرمونات المخ الاساسية زي الاندورفين والسيروتونين وغيرهم. كل ده ايلون ماسك قاله وانت جاي تقول ان ده هيصة ومبالغات !!!
ايلون ماسك قدم العرض بمنطق التسويق مش بالشكل الخاص بالمؤتمرات العلمية. يعني هو قدر يكلمك عن Benefits او الفوائد المستقبلية وحط تحت كلمة المستقبلية ١٠٠ خط لكن كان قليل اوي في كلامه عن Features او التصميم وتركيب الجهاز . يعني لو هبيع لك كمبيوتر مش هتبقي مهتم انك تشتري لو قعدت اقولك انه اتصنع من البلاستيك وشرائح سيليكون لكن هقولك انه خفيف وعملي وسريع في معالجة المعلومات وهيبقي تحفة في الجيمز ساعتها ممكن تهتم وتشتري.
ايلون ماسك هدفه الحقيقي من مؤتمر زي ده هو انه يقدر يجمع استثمارات وتمويل اكتر ويوصل بنموذج مطور لفكرته للميديا عشان تصنع الزخم المطلوب لتحقيق الغرض. لو تبحث عن رأس مال شركة Neuralink اللي أسسها ايلون ماسك مع شركاء اخرين لصنع الجهاز ده هتلاقيه 158 مليون دولار منهم ١٠٠ مليون دولار من ايلون ماسك نفسه وهو بنفسه صرح من سنة انه مش عايز تمويل خارجي يعني عايز تمويل جهات ومؤسسات امريكية فقط ولما اتسأل متحدث عن شركته عن مصادر تمويل المشروع مقدمش اجابة !
طيب نقرأ كده الجزء ده من خبر عن الشركة منشور السنة اللي فاتت لما استثمر ايلون ماسك بنفسه ١٠٠ مليون دولار واللي هيعتبرها خطوات اولية في المشروع :
Neuralink, a company in which Mr. Musk has invested $100 million, detailed the baby steps it has taken toward that goal. Neuralink described a “sewing machine-like” robot that can implant ultrathin threads deep into the brain.
طيب نبص كمان علي الخبر ده في بلومبرج المتخصصة في الاقتصاد
طيب انا ليه بقول بلاش مبالغة في تقدير المشروع ولا نبالغ في التوقعات وبلاش انبهار ؟
لأن ببساطة هو قدم وسيلة تكنولوجية ممتازة لفهم ورسم وجمع معلومات عن بيولوجيا المخ وقدم لك ايه الأفاق والفرص اللي ممكن العلماء بعد كده يستخدموا جهازه ده لتحقيق تقدم فيها. يعني الجهاز ده في حد ذاته مش هيعالج الشلل ولا الاكتئاب ولا الزهايمر. كمان لما الجهاز يقدر يتابع ويرصد الحرارة وكفاءة خلايا المخ ومستوي ضغط الدم مثلا ممكن ده يساعد الاطباء في متابعة الحالات المرضية المختلفة بشكل افضل ويقدروا من خلال البيانات الخاصة بمستوى الهرمونات يعرفوا لو الشخص بيعاني من اكتئاب او قلق وتوتر مثلا او صرع لكن كل ده فيه تحاليل واشعة واجهزة رسم مخ بتجمع معلومات زي دي. فكرة التحكم في الذاكرة والتخاطر Telepathy والتواصل عن بعد مع الاجهزة الذكية وغيرها ده مجال مش بعيد عن العلم لكن بعيد عن الفترة اللي بنعيشها حاليا لسه.
يا سرور الرجل نشر ورقة بحثية معتمدة وناس كتير عندهم متابعين بالآلاف نشروا الكلام ده ولينك البحث اهو
https://www.biorxiv.org/content/10.1101/703801v2
طيب الموقع ده متاح فيه نشر اي ورقة بحثية بدون ما تتراجع من اي متخصصين !!
اه والله العظيم وهضيف صورة من الموقع نفسه بتأكد كلامي ده وده مش عيب بس مينفعش نستخدمه كأنه دليل قاطع علي صدق الموضوع.
طيب مش يمكن انا فهمت ايلون ماسك غلط ومتابعتش المؤتمر كويس !
طيب نقرا كده الجملتين دول عن هدف المشروع والمنشور من سنة في صحيفة نيويورك تايمز
The company claims the system will eventually be capable of reading and writing vast amounts of information. But as with many of Mr. Musk’s other ventures, like spaceships or futuristic tunnels, one of the biggest challenges may be for his scientists to match his grand vision.
يعني هدف الشركة هو تصميم جهاز قادر علي قراءة وجمع كم هائل من المعلومات من المخ. لكن وكالعادة مع ايلون ماسك دائما بنشوفه بيضيف احلامه وخيالاته زي مشروع المركبات الفضائية وغيرها. فهو بيقدم فرصة للعلماء انهم يستخدموا التكنولوجيا الحديثة اللي بيقدمها في الوصول لحلول افضل للتحديات الضخمة اللي بتقابل البشرية عشان في النهاية يحقق ايلون ماسك رؤيته العظيمة.
ختاما التعامل مع المخ البشري مش سهل يا جماعة ومعقد لأقصى درجة. ايلون ماسك طموح جدا وموهوب لكن هو كمان موهوب جدا في التسويق لشركاته ولأفكاره. عشان كده نتعامل مع الموضوع في حجمه الطبيعي انه جهاز جميل فكرته ممتازة ومستقبل استخدامه واعد وبس …..
محمد صلاح سرور
